Pamuno sang Office of the Building Office sang Bacolod nga isa sa ginpasakaan kaso sang anay konsehal nagklaro nga wala sila sang na-issue nga permit sa ginareklamo nga baligyaan litson
Kabahin si Office of the Building Official-OIC, Engr. Isidro Sun sa tatlo ka mga department heads sang Bacolod nga ginpasakaan kaso ni anay konsehal Ricardo Tan tungod sang baligyaan litson nga ginakabig illegal structure.
Ang ginareklamo nga baligyaan ang asta karon wala pa makakas sa atubang sang iya propiedad sa Barangay Villamonte.
Gani ginkwesyon ni Tan kun ngaa natagaan ini sang permit sang Business Permits Licensing Office, OBO kag CHO.
Pero matigdas nga ginpaginwala ni Sun nga wala siya sang may ginpirmahan nga permit angut sa ginareklamo nga baligyaan.
Nagapati siya nga ang kaso nga ginpasaka ni Tan ang may kaangtanan sa ginaplano sini nga pagpatukod sang mausoleo sa patyo sa Barangay Alijis.
Sadto anay si sun ang ginpasakaan na sang kaso sang anay konsehal may angut sa ginatukod nga resort malapit lang sa Campuestohan Highland Resort nga iya ginapanag-iyahan.
Magluwas sa tatlo ka mga department heads ginpasakaan ni Tan sang kaso nga grave abuse of authority, grave misconduct kag dereliction of duty ang City Fire Marshall kag isa pa ka katapo sang Bureau of Fire Protection sang Bacolod.