Gina-proseso na karon sang kapulisan ang mga dokumento sa pagpasaka sang kaso nga reckless imprudence resulting in homicide batuk sa driver sang motorsiklo nga nakabunggo sa iloy nga nagatabok sa pedestrian lane malapit sa isa ka ospital sa dalan Araneta, Barangay Pahanocoy sa syudad sang Bacolod, sang tinalikdan nga Miyerkules, Hunyo 11.
Ginpahayag ni Police Executive Master Sergeant Rodney Tiania sang Traffic Management Unit, wala sang patimaan nga maga-areglo ang pamilya sang biktima nga ginkilala kay alyas Ruth, 40-anyos, residente sang Barangay Pahanocoy.
Sandig sa imbestigasyon, nagatabok sa pedestrian lane padulong nasidlangan si Ruth upod ang iya menor de edad nga bata mga la 1:15 sang hapon, Hunyo 11, sang nabungguan ini sang Euro nga motorsiklo nga nagadalagan pa norte sang dalan.
Ginamaneho ang motorsiklo ni alyas Cris, 20-anyos kag angkas sini ang 19-anyos nga si alyas Jo.. Pareho sila nga naka-angkon sang mga pilas kag gindala sa ospital.
Suno kay Tiania, may kadasigon ang pagpadalagan sang motorsiklo ni Cris, rason nga wala sini malikawan ang pedestrian.