Humalin sang 2007 naga saylo saylo lang sang puluy-an si Mauro Sabino. Wala sila abe sang permanente nga ilistaran sang iya misis kag duha ka mga anak.
Sang bagyo nga odette ang nagligad nga tuig naguba ang gina arkelahan nila nga balay gani nag saylo naman sila diri sa may boundary sang Barangay 2 kag 8. Ini ang iya nga balay, kawayan kag mga sin ang dingding.
Sa sulod may folding bed sa sala sa kilid sang kusina. Diri sila sang iya misis naga tulog. Sa isa ka kwarto naman ang anak niya nga lalaki.
Sang maghapit sa ila nga lugar ang kampo ni Bacolod City Mayor Albee Benitez sang Sabado, nakumpirma niya gid man ang balita nga ang plano nga pagpatukod sang daw condominium style nga puluy-an sa ila nga lugar.
Kun mangin mapalaron ini ang histura sang mahimo saylohan sang pamilya ni Mauro.
May kalan-an, kusina, banyo, sala kag kwarto ini ang pasampol kun ano ang hitsura sang mga ipatukod nga mga units sa Yuhom Village, ang on site housing project sang siudad sang Bacolod. Daw kasubong sang mga units sa mga condominium.
Ini ang mangin unod sang lima ka floors nga vertical housing projects. Suno sa kay Human Settlements and Urban Development Secretary Jose Rizalino Acuzar, kabahin ini sang isa ka milyon ka mga puluy-an nga ila patukod sa bilog nga Pilipinas sa kada tuig. Ang Bacolod ang isa sa mga napili nga mga lugar sa una nga tuig. Indi libre ang kada unit, pero bayaran ini sang mga pumuluyo sa barato nga kantidad.
Suno kay Mayor Benitez, gina finalize pa ang disenyo sang mga balay. Pati ang bili sang balay gina pangitaan sang pamaagi nga mangin barato kag masarangan pati na ang size sang unit maga depende man sa kun pila ang miyembro sang pamilya nga maga istar diri.
Informal settlers ang target nga mapaistar diri .
May tatlo na ka mga inisyal nga mga sites para sa amo nga project, sa Barangay 8, sa Banago kag sa Purok Arao sa Barangay Granada.
Gina lauman nga sa bulan sang Oktubre maka ground breaking ni para sa pagsugod sang sini nga proyekto.