May tensyon Martes sang aga sa tunga sang barangay kag sang pamunuan sang Bacolod City Legal Office sa pagpahalin sang napulo ka mga kiosko nga nagalapaw sa sidewalks sa dalan Rizal sa Barangay 12 sa Bacolod.
Nangin mainit ang diskusyon ni Atty. Reuben Sabig, pamuno sang Bacolod Traffic and Transport Management Department kag ni Barangay 12 Punong Barangay JR Alcantara, samtang ginapangkakas sang CLO ang mga istruktura sang ila trade fair nga nagalapaw sa kilid sang dalan sa gwa sang BAYS Center .
Bisan pa nga may yara sang permit ang barangay para sa amo nga baligyaan, siling ni Sabig, indi pwedi nga maglapaw ini sa sidewalk bangud delikado ini kay wala na sang alagyan ang mga pasahero sang mga depasahero nga mga salakyan.
Ini bangud ang ginatindugan sang mga canopy sang mga baligyaan, ang isa ka designated area para sa pagpasaka sang mga pasahero.
Boluntaryo man nga ginpangkakas sang mga vendors Lunes sang aga ang ila mga istruktura nga naglapaw na sa gutter sang dalan.
Suno naman kay Retired Police Colonel Levy Pangue, pamuno sang CLO Enforcement Team, makapila na ka beses nga ginhawanan sang siudad ang amo nga lugar, apang ginpabay-an ini sa gihapon sang Barangay.
Dugang pa niya ginpintahan pa sang Barangay sang color yellow nga linya ang amo nga dalan, butang nga ginadumilian sang BTTMD.
Sandig sa special permit sang Barangay 12 nga gin-approve sang Sanguniang Panlungsod, ginatugutan ang mga vendors nga magpa tigayon sang trade fair humalin Abril 15 tubtob Hunyo sini nga tuig.
Ini ang kabahin sang palaabuton nga piyesta sang barangay sa Hunyo 24.
Gintinguhaan man sang Digicast Negros nga makuha ang bahin ni Punong Barangay Alcantara, apang nagpamalibad pa ini nga magpa-interview.
Nakigsapol na ang punong barangay sa pamunuan sang CLO kag kay Bacolod City Mayor Greg Gasataya kaina sang aga agud ma solusyonan ang amo nga problema.*
[sibwp_form id=1]