Gin-summon sang Bacolod City LGU ang Environmental Management Bureau Negros Island Region bangud sa ginapatihan nga kwestionable nga paghatag sang Environmental Compliance Certificate ukon ECC sa daan nga dumpsite sang siudad nga nahamtang sa Barangay Mandalagan.
Ginsiling ni Bacolod City Legal Officer Karol Joseph Chiu nga nga bisan may stoppage order kag notice of violation nga gin-issue sang siudad sa pribado nga kompaniya nga nagadumala sa amo nga dumpsite, ginhatagan ini sa gihapon sang EMB-NIR sang ECC.
Mayo sang tinalikdan nga tuig, ginpauntat na sang siudad ang construction kag pagkalkal sang basura sa amo nga dumpsite bangud suno kay Chiu wala ini sang mga nagakaigo nga dokumento.
Apang Hulyo sang tinalikdan man nga tuig nakakuha sa gihapon sang ECC ang pribado nga kompaniya.
Ginapasabat sang siudad ang EMB-NIR kun nakalabay gid man sa legal nga proseso ang paghatag sang ECC sa daan nga dumpsite.
Dugang ni Chiu, delikado nga ginakalkal ang basura sa daan nga dumpsite bangud wala pa sang disposal plan ang EMB kag ang siudad para diri.
Ginalantaw man ang posibilidad nga mag-ubra sang bag-o nga landfill para ma dispose ang mix garbage nga yara pa sa dumpsite.
Ginklaro man sang CLO indi siudad ang nagapanag-iya kag nagadumala sang old dumpsite bangud natapos na ang Memorandum of Agreement nila sa pribado nga kompaniya.
Suno kay EMB-NIR Director Vicente Losbañes, indi siya anay maghatag sang statement parte diri tubtob indi pa matapos ang technical conference bwas nga adlaw.
May ipadala nga tiglawas ang EMB-NIR sa Bacolod City Government Center para sa natalana nga technical conference.
[sibwp_form id=1]