Wala na sang kabuhi si Police Lt. Col. Romeo Vargas sang masapwan sang iya bata sa sulod sang iya kwarto sa ila balay sa Zone 11, Barangay Handumanan sa Bacolod City, mga las 8 kaina sang aga, Martes, Mayo 19.
Base sa inisyal nga impormasyon, natingala ang bata ni Lt. Col. Vargas nga ara pa ang motor sang iya amay gani gin-check niya ang kwarto kag nakita ang iya amay nga nagahigda na sa salog kag duguon.
Wala na anay naghatag sang dugang pa nga impormasyon ang PNP sa kamatayon sang opisyal.
Ang 56-anyos nga si Lt. Col. Vargas amo ang chief sang City Administrative Resource Management Unit sang Bacolod City Police Office kag 33 na ka tuig nga nagaserbisyo sa Philippine National Police.
Nagakasubo ang bilog nga pwersa sang kapulisan sa BCPO kag Negros Island Region sa pagtaliwan ni Vargas kag sila ang nagapalab-ot sang simpatiya sa himata sang police official.
Naga-ayo naman sa publiko si Police Col. Eugene Rebadomia, city director sang BCPO nga hulaton anay ang comprehensive investigation sang Scene of the Crime Operatives, kag ipa iway ang spekulasyon ukon magpalapta sang sala nga impormasyon, bilang paghatag man sang respeto sa nalisdan nga pamilya.
Natalana na kuntani nga maga-retiro sa serbisyo si Vargas sini nga Oktubre.
“He is due for retirement sa October 8, 2026. Supposedly, sa sini nga July 8, 2026, ma-non duty status na siya amo na na-turnover na gani ang mga iban nga gamit kay amo na ang SOP sa PNP, three months before compulsory retirement. Actually, ma-NDS na siya, ara na ang order niya sa July 8, tapos supposedly mag-leave na siya sa June 6, dire-diretso na sa non-duty status”, suno kay Rebadomia.*
[sibwp_form id=1]