Sa ika duha nga tion sini nga tuig, liwat nga nakabaton sang bomb threat ang Hall of Justice Miyerkules sang aga.
Isa ka abogado sang Public Attorney’s Office ang nakabaton sang amo nga tawag sa telepono sang ila nga talatapan.
Temprano pa nag ginuwa Miyerkules sang aga gikan sa Hall of Justice ang mga empleyado kag iban pa nga may mga transaksyon sa amo nga talatapan.
Ini kasunod sang pagkabaton sang isa ka abogado sang Public Attorney’s Office mga lapit las otso sang aga sang tawag sa ila nga landline.
Ginsiling sang caller nga dapat mag gwa na kay palukpon ang bomba las 9 sang aga. Gin pa gwa ang tanan nga yara sa sulod sang talatapan bilang kabahin sang standard operating procedure. Pasado las dies nag abot ang bomb squad.
Paathag ni Capt Paul Vincent Pendon station commander sang Police Station 2, ini bangud sang gin observe nga waiting time, labi na nga may nakasaad nga oras sa ginbuy-an nga pagpamahog.
“Nag-abot K9 EOD naton around 11 am na. Tungod kay ang reason nga ang pag threat is may specific time. With that may waiting time sila nga ginatawag sa sop nila nga hulaton anay kun mag explode or indi gid man. That’s the time mag kadto sila to assess the area. Pero ara lang sa aton nga area ang aton nga eod. May anggulo ta nga ginalantaw nga posible basi tungod sa isa ka daku nga kaso,” suno kay Pendon.
Ang 31 anyos nga si Akhira Rekamatsu nakibot nga indi sila makasulod. Las 10 na schedule ang iya nga kasal sa Branch 47. Naghulat nga basi pa lang antes matapos ang bilog nga aga madayon ang ila nga kasal.
“Dayunon enkaso ma clear na sila sa babaw. Kun no choice gid mahulat kami,” suno kay Rekamatsu.
Gin-schedule na sang Branch 47 sa hapon ang ila nga mga damlag pa naka schedule nga kasal.
Suno kay Executive Judge Raymond Joseph Javier ika duha na sa sini nga tuig sila nakabaton sang kasubong nga pagpamahog. Tuman ang perwisyo sa mga hilikuton ang kasubong nga mga hitabo. Sini na nga hapon nagbalik normal ang hilikuton sa mga talatapan. Indi pwede nga maliwat pa ini.
Nagalaum si Judge Javier nga ma locate ang responsable sa likod sa sini nga mga tawag kag dapat nga magapanabat ini.
“if we will know the identity of the prank caller, then we will be filing appropriate charges against him. Our first step is for the identification of the prank caller. This has to stop,” suno kay Judge Javier.
Ginalantaw sang pulis nga mahimo may kaangtanan ang bomb threat sa isa ka daku nga kaso ukon may isa ka persona nga may kahilabtanan sa daku nga kaso. Suno naman kay Judge Javier, indi ma discount ang posibilidad nga may kaangtanan sa sahi sang trabaho ang natabo nga pagpamahog.