Ini ang ginpahayag ni Bacolod Congressman Albee Benitez, kaupod ang Presidente kag CEO sang Negros Power nga si Roel Castro.
Suno kay Benitez, nagpasalig ang Negros Power nga ginahimo nila ang tanan nga pamaaagi agud masiguro nga mabalik ang kuryente sa Bacolod sa Domingo, ukon antes pa sini.
Ginpasiguro man sang kompanya nga padayon ang ila pagpaninguha agud mapadasig ang pagkay-o sang mga linya kag pasilidad nga naguba sang bagyo nga nagresulta sa malawig nga brownout sa siudad.
May mga lineman na sila nga gindugang halin sa sister companies nila para mapadasig ang trabaho.
Ginpahayag ni Castro nga mas daku ang damage sang kuryente sa siudad sang Bacolod rason nga nagkinahanglan sang pila ka adlaw antes ma-restore ang main power source sang mga substation kag ang mga poste nga nagakonekta sa mga feeders.
Dugang pa ni Castro, kalabanan sang mga poste ang nahamtang sa mga luar nga indi masudlan sang ila mga salakyan. Gani, ang paghakot sang mga kagamitan mano-mano.*