May mga natalana nga shipment sang mga gamefowl ukon inugbulang nga manok, mga itlog kag dressed chicken padulong sa probinsya ang wala madayon.
Ini kasunod sang pag kabaton sang impormasyon sang shipper nga ginapatuman karon sang Negros Occidental ang temporary total ban sa pag sulod sang tanan nga live domestic kag wild birds lakip na ang ila sini nga mga produkto, gikan sa tanan nga rehiyon sa pungsod.
Nalakip man sa ban ang poultry meat, day old chicks, mga itlog, semen kag manure.
Sa mando ni Governor Eugenio Jose Lacson , ang ban nag sugod kahapon, Pebrero 28 tubtob sa Marso 15.
Suno kay Dr Renante Decena ang tikang ginpatuman kasunod sang gin-report positibo nga kaso sang highly pathogenic avian influenza H5N1 strain ukon bird flu sa Bulacan kag Pampanga.
Suno kay Decena ang amo nga strain ang highly pathogenic ukon maka mamatay kag maka apekto sa tawo. Tinutuyo sang ban nga mapangapinan ang poultry industry sang probinsya lakip na ang mga pumuluyo sa mangin epekto sang bird flu.
Mga checkpoints ang ginpahamtang kag ginpabakod man ang biosafety, hygiene kag sanitation standards.