Bulan pa lang sang Hulyo amat amat na nga nagdamo ang mga nagapangalimos nga Badjao sa mga dalanon.
Gani kahapon isa ka surveillance operation ang ginpangunahan sang katapo sang Department of Social Services and Development upod sa kapulisan.
Sa Barangay 16 natultulan ang tatlo ka mga balay nga gina arkelahan sang katorse ka mga pamilya sang Badjao.
Suno kay Pacita Tero,pamuno sang DSSD sa Bacolod, gin rentahan sang mga Badjao nga naggikan sa probinsya sang Cebu ang tatlo ka mga puluy an agud man makapadayon sila sa pagbaligya sang alahas karon nga nagahilapit ang Masskara Festival.
Taliw-as ini sa nabaton nila nga impormasyon nga may nagasapopo sa mga badjao nga masami ginabyahe halin sa Mindanao para mangalimos sa tion sang tuigan nga selebrasyon sa siudad.
Istorya sang isa sa mga tiglawas sang Badjao, napilitan sila nga mangita sang palangabuhian bangud masami ginapalayas kag ginasakit sila sa mga lugar nga ila temporaryo nga natiniran.
Suno kay Tero nakasugtan nila nga tagaan sang opportunidad ang mga Badjao nga makabaligya tubtob matapos ang Oktubre. Pero hugot nga dumilian ang ila pagpangalimos sa dalan ilabi na ang pagkulkol sang magagmay nga kabataan sa tunga sang dalan.
Ang DSSD pinaagi sa Anti Mendcancy Team ang magapatigayon man sang profiling sa mga badjao agud masiguro nga makabalik sila gilayon sa ila ginhalinan pagkatapos sang Masskara.
Karon nga may yara man sila sang nasuguran nga palangabuhian ginalauman sang ahensya nga sa dalayon indi na mag gasto pa ang siudad sa pagkaon nila kag plete papuli.