Perfect attendance ang una nga batch sang mga Grade 12 students nga nagbalik na sa classroom para sa pilot face to face classes sa Alangilan National High School kaina sang aga.
May tag 20 lang ka mga estudyante ang sarang makasulod sa duha ka separado nga classroom bilang pagsunod sa mimimum health protocol. Ang isa ka batch Lunes kag Martes, ang second batch Huwebes kag Biyernes.
Ang eskwelahan sa Barangay Alangilan ang kabahin sa onse ka mga eskwelahan sa Negros Occidental kag Bacolod nga gintugutan sang Department of Education para sa pilot run sang limited face to face classes sa Western Visayas.
Suno kay Em Ang, executive director sang Emergency Operations Center, kabahin sang pagsulundan para sa limited face to face classes sa pampubliko nga eskwelahan amo nga nalakip ang barangay sa mga low risk areas.
Fully vaccinated naman ang mga school teachers kag staff sang eskwelahan.
Magatakop ang pilot run sa bulan sang Enero.
Nagalaum ang pamunuan sang eoc nga kun mangin madinalag-on, magasugod man ang limited face to face classes sa iban pa nga eskwelahan sa Bacolod sa madasun nga tuig.