Wala gina paabot sang kadam-an ang pag-file ni anay vice governor Genaro Lim-ao Alvarez bilang alkalde sang Kabankalan aga sang last day sang filing.
Suno sa COMELEC nag-file siya bilang independent.
Kaina man sang aga nag-file para sa iya nga re-election bid si Mayor Benjie Miranda. Mangin bise alkalde niya ang iya asawa nga si Divina Miranda.
Nag-file sila nga full slate. Antes pa man ang Miranda-Miranda, nag-file na sang ila nga COC ang Zayco-Zayco tandem, si anay Mayor Isidro Zayco bilang alkalde kag Vice Mayor Miguel Zayco nga maga pa re-elect.
May isa pa gid nga nag file man sa pag ka mayor sa Kabankalan nga ginkilala kay John Cordero. May isa pa gid nga nag-file man COC bilnag alklade sang Kabankalan nga ginkilala kay Eliezer Duron.
Nag-file man sang COC sa pagka bise alkalde sang Oktubre 7, si Alice Marie Zayco-Gomez nga makit-an sa litrato ang gin-updan ni Alvarez.
Sa pihak nga bahin, tigayon naman naka file sang iya nga COC si Councilor Anejo Nicor bilang mayor sang La Castellana kag vice mayor naman si Mayor Rhummyla Nicor-Mangilimutan.
Sa Isabela naman, nag-file COC bilang alkalde si Miguel Angelo Yulo nga anak ni Congressman Dino Yulo kag upod niya si anay vice mayor Renato Malabor, Jr.
Nag-file man si Vice Mayor Juan Miguel Montilla bilang alkalde sang banwa kag ang iya iloy nga si Mayor Irene Montilla bilang vice mayor namon.
Sa siudad sang La Carlota, naka file naman para sa iya nga re-election bid si Mayor Rex Jalando-on upod ang iya bilog nga slate.
Sa Himamaylan City, nag-file man Martes si Mayor Raymund Tongson sang iya nga COC para sa iya re-election bid.