Nanaog na sa lima gikan sa walo ang mga evacuation center sa banwa sang La Castellana.
Sa datus sang Provincial Social Welfare and Development Office, as of June 13 sang gab-i, may 783 ka pamilya ukon ukon 2,922 ka mga persona ang naga pabilin sa evacuation center. Suno kay Irene Bel Plotena ang pamuno sang Disaster Risk Reduction Management Office sang Negros Occidental, ini sila ang gikan sa Biak na Bato, Cabacungan, Cabagnaan, Camandag, Masulog kag Sag-ang. Paathag ni La Castellana Mayor Rhummyla Nicor-Mangilimutan ang ila nga pag hatag sang clearance sa mga pumuluyo sa pag pauli sa ila nga mga balay ang naga depende sa sitwasyon sang bulkan kasubong man sa mga lugar nga napahamtangan sang sini nga mga pumuluyo. Ang nabilin nga evacuees ang gikan sa mga critical areas – ayhan sila nalakip sa 4 km permanent danger zone ukon ang ila lugar naga atubang sang peligro bangud sang posible lahar flow.
“Ang amon lang gid is if mag sige ulan, te ang lahar area, kag mag sige taas ang parameter sa paglupok te i-hold gid sila namon, especially those sa 4-km danger zone kag ang baha”, suno kay Nicor-Mangilimutan.
Samtang, ginklaro naman sang alkalde nga may gina patuman nga protocol bahin sa pag panagtag sang relief goods. Ini sa tunga sang reklamo nga ginabalabagan ukon indi direkta maka hatag sang relief goods. Suno sa iya centralized ang pagpanagtag sini, gani kun may luyag nga maghatag, ini sila ang dapat mag coordinate sa munisipyo. Sa sini nga pamaagi, ma record ang nag abot nga mga goods kag mapasiguro man nga alalangay ang pag panagtag sa mga apektado.