Libre na subong ang anti-rabies vaccine sa Bacolod City Health Office.
Ini ang gin-anunsyo ni Mayor Greg Gasataya kasunod sang pagpirma niya sang Executive Order No. 59.
Sumugod subong, mahimo na makabaton sang libre nga anti-rabies vaccine ang mga pumuluyo nga naga kinahanglan sini sa City Health Office.
Suno kay Dr. Carlo Ortega, Animal Bite Center Coordinator sang Bacolod City Health Office, limitado pa ang supply sang anti-rabies vaccine.
Dugang pa ni Ortega nga base sa Executive Order No. 59, prioridad sa karon ang mga senior citizens, indigents kag ang mga may medical certification halin sa Department of Social Services and Development (DSSD) nga nagapamatuod nga kinahanglan gid nila sang bulig.
Ginpaathag man ni Ortega nga pwede gihapon makabenepisyo ang iban nga pumuluyo basta makasunod sila sa standard sang DSSD lakip na diri ang pag present sang certificate of indigency halin sa barangay.