Ang kawatan wala na sang may ginapili nga lugar sa karon. Mismo ang compound sang San Antonio Abad Parish Church sa Barangay Taculing sa Bacolod, ginsulod sang kawatan sang kahapon.
Samtang naga panyaga sa kwarto ang mga staff sang simbahan, masako man ang kawatan sa pagtiid sa katupad lang sini nga kwarto. Sa CCTV footage sang simbahan makita ang ini naka puti nga t shirt kag naka shorts ang kawatan.
Nag sulod sa sini nga kwarto sang mga naga serve sa simbahan kag matapos ang pila lang ka segundos nag gwa na.
Suno kay Fr. Noli Blancaflor, posible nga may upod siya nga iya ginpasahan sang laptop kag mga relo sang kabataan sa may bentana. Sa may kudal sang simbahan sa kilid sang suba posible kuno nga nag agi ang kawatan.
Ulihi na lang nila natalupangdan nga ang laptop nga gina gamit sang ila sakristan sa online class ginkawat. May mga relo man nga ginpang kuha.
Sang December 23 nagligad nga tuig ginkawatan man ang isa ka staff sang simbahan.
Ginkuha ang iya sini nga kahita nga natungtong sa iya nga bike. Lalaki nga naka motorsiklo ang nakuhaan sang video nga nagkawat sini.
Suno kay Fr. Noli, dugay na nila luyag ipakaayo ang pader sa kilid sang simbahan ugaling naga padayon pa ang pag ubra sang riprap sang siudad sa gwa sang ila kudal.
Nagalaum ang tagdumulahan sang simbahan nga pinaagi sa CCTV footage basi pa lang makilal-an ang kawatan para mabalik ang gamit sang mga kabataan nga staff sang simbahan.