Handa na ang tanan para sa pag abot ni presidential candidate Manny Pacquiao sa Bacolod bwas nga adlaw.
Yara pa sa karon ang senador sa Iloilo. May nag gwa nga litrato nanday Senador Pacquiao kaupod si Bacolod mayoral candidate Albee Benitez sa iloilo sini nga adlaw.
Kun bala maga suporta sa Pacquiao kay Benitez suno kay anay Bacolod mayor kag congressman Monico Puentevella ang senador na lamang ang maka sabat.
Suno kay Puentevella, gikan sa Iloilo via chopper kag maga derecho sa Silay City si Pacquiao kun sa diin siya ang maga bisita man kay Mayor Mark Golez.
Maga bisita man siya kay Talisay City Mayor Neil Lizares kasubong man sa Talisay public market.
Natalana nga mag courtesy call ang senador kay Negros Occidental Governor Eugenio Jose Lacson sa aga.
Suno kay Provincial Administrator Rayfrando Diaz, bisan pa nga nag pabutyag na sang iya nga suporta ang gobernador sa kay Vice President Leni Robredo bukas ang Kapitolyo Probinsyal sa tanan nga luyag mag bisita.
May naka schedule man nga courtesy call kay Bago Mayor Nicholas Yulo kag pag bisita sa Bago public market.
Wala na sang patigayunon nga rally sa Bacolod public plaza kag tigaylo may panyapon siya kaupod sa mga pastor.