Digicast Negros

Isa sa pinaka-una kag pinakalawig nga community newspaper sa isla sang Negros nagsira; 31 ka mga empleyado apektado

Subong nga adlaw (October 17) ang pinaka-ulihi nga issue sang The Visayan Daily Star, ang isa sa pinaka-una kag pinakalawig nga community newspaper sa bug-os nga isla sang Negros.

Suno sa column sang General Manager sang TVDS nga si Carlo Leonardia sang October 16, 2020 sini nga issue, matapos ang 38 ka tuig nga paghatag sang masaligan kag patas nga mga balita sa komunidad, magapanira ang ila talatapan bangud sang problema pinansyal.

Ginpahayag ni Leonardia nga antes pa man ang COVID-19 pandemic, naga amat-amat na diutay ang mga nagabakal sang newspaper kag ang kadam-an ang nagabasa na sang balita sa ila website kag social media page sang libre ukon wala sang bayad.

Gindugang pa ni Leonardia nga ginhimo na nila tanan para masalbar ang ila negosyo pati na ang mga empleyado sini pero mas nangin mabudlay pa gid ang sitwasyon sang ila talatapan bangud sang pandemya.

Suno sa tiliman-an sang Digicast Negros, 31 ka mga empleyado sang VDS ang nawad-an sang trabaho.

Isa diri ang pioneer reporter kag editor nga si Carla Gomez.

“It’s been 38 years of fulfilling work. We all worked with a passion because we love journalism and the difference it can make for the community. It is very sad to see the newspaper we helped build close,” suno kay Gomez.

Para naman sa reporter nga si Marchel Espina, bisan sang nagligad nga tuig lang siya nagsugod sa pag-obra sa TVDS, indi niya malimtan ang ila malipayon kag mapag-on nga pag-inupdanay sa news room kag ang pag-upod sang ila grupo sa mga advocacies sang mga mamantala kasubong sang #DefendPressFreedom kag #IbalikAngABS-CBN nga mga rally.

“Integrity and dedication of the small group of journalists amid the hardships, as we have remained committed in our work as truth-tellers. For me, VDS will not become the institution that it is today if not for the dedicated journalists behind it,” suno kay Espina.

Ginsiling ni Leonardia nga tinguhaan sang VDS nga magbalik online pero indi na ini mangin libre bangud bilang isa ka media outlet may yara man ini sang mga galastuhon kasubong sang pagpa-sweldo sa mga empleyado kag iban pa.

Exit mobile version
Skip to toolbar