Luyag sang Negros Occidental nga mag “Go Green” sa away kontra sa RSSI. Indi ini mag suporta suno sa gobernador sa gina duso nga aerial spraying sang chemical.
Ginsiling ni Governor Eugenio Jose Lacson nga ang suportahan lamang sang probinsya ang biological control para matapna ang pag pang atake sang red striped soft scale insect sa mga katubuhan.
Luyag nila nga suportahan ang fungal production nga isa sa pamaagi para matapna sa natural nga pamaagi ang RSSI. Suportahan nila ang mga laboratory nga kinahanglan para sa fungal production.
Damlag pa ginduso ni UNIFED president Manuel Lamata ang massive spraying paagi sa aerial spraying sang chemical sa 250,000 ka ektariya sang katubuhan sa bilog nga isla. Ini ang nagabalor sang P200 million.
Ginsiling ni Lacson nga may pila ka mga sektor nga nag pabutyag sang kabalaka sa amo nga sahi sang spraying. Una suno gobernador may mga katubuhan nga yara mismo nahamtang malapit man sa mga komunidad.
Ika duha gina lantaw man ang mahimo nga epekto sa aquaculture kag sa iban nga kasapatan.
Ang wind direction suno kay Lacson isa sa mga factor nga dapat hatagan sang konsiderasyon.
Ginsiling man damlag pa ni Lamata nga safe sa pumuluyo kag kasapatan ang iya nga gina duso.
Suno kay Lacson natural nga pamaagi ang gamiton sang probinsya indi lamang sa RSSI kundi pati na sa palaabuton pa nga mga pest problems.
Sa pihak nga bahin, ginsiling ni 5th District Rep Dino Yulo nga maga abot sa Miyerkules ang team gikan sa National Crop Protection Center kag talakayon nila ang RSSI, army worms kag ang integrated pest management. Sila ang magasapol upod sa mga Municipal Agriculturists sa 5th District.
[sibwp_form id=1]