Ginakabig nga temprano nga pamaskwa sang 2 ka job order workers sang ginpabalo sila ni Bacolod City Mayor Greg Gasataya nga regular na sila nga empleyado sang LGU, sini nga Disyembre 16.
Kaina sang aga, ginpatawag sang alkalde sanday Ronnie Cordova kag Andrew Bisquerra, nga sa una wala sila makahibalo kun ano ang rason sang amo nga pagpatawag. Dako ang ila kalipay sang ginpahayag sa ila nga regular na sila nga empleyado sang siudad.
Suno kay Ronnie Cordova, 34 ka tuig na siya nga nagaserbe bilang job order worker, gani indi niya matago ang iya kalipay matapos ang madugay nga paghulat para sa regular nga posisyon.
Samtang si Andrew Bisquerra naman ang residente sang Barangay 12, nga gin-relocate sa Arao, Vista Alegre, kag pareho man nga nagpasalamat bangud sang oportunidad nga ginahatag sa ila.