Bacolod Emergency Operations Center ang nagapahanumdum sa publiko nga apesar sang suspension sang curfew sa bisperas sang paskwa kag bag-ong tuig ginadumili-an sa gihapon ang paghiwat sang parties ukon family reunion.
Samtang, ginahulat na lang nga maaprubahan sang alkalde ang ginpasar nga unified travel guidelines sang EOC.
Iga-suspend ang curfew sa siudad humalin las onse sang gab-i sang Disyembre 24 tubtub las tres sang aga sang Disyembre 25 kag kasubong man sa Disyembre 31 tubtub Enero uno.
Pero suno sa deputy for medical sang Bacolod EOC nga si Dr. Chris Sorongon, indi ini dapat rason sa paghiwat sang party ukon grand family reunion bangud ginadumili-an pa ini sa gihapon sang siudad bisan pa nga manubo na ang mga bag-o nga kaso sang COVID-19 sa bacolod sini nga bulan sang Disyembre.
Paathag ni Sorongon, tinutuyo sang suspension sang curfew amo nga mapahanugutan ang pumuluyo nga makasimba pa sa gab-i antes sang bisperas sang paskwa kag bag-ong tuig ukon makahapit sang makadali sa panimalay sang mga himata.
Pero pahanumdum sang EOC nga bisan sa mga miembro sang isa ka pamilya mas maayo kun nakasuksuk sa gihapon sang face mask kag magsunod sa physical distancing.
“Wala ni siya nagahambal nga pwede na kita ya ka grand family reunion wala man siya nagahambal nga pwede nakita kagwa asta sa kaagahon ang gina emphasize lang da sa gihapon ni Mayor Bing nga ang aton pagselebrar sang aton nga Christmas kag New Year’s eve should be limited to our immediate family members,” suno kay Sorongon.
May ginpasar na nga unified travel guidelines ang EOC para mangin masulhay ang pagbaton sang siudad sang mga returning residents kag pati man sa mga magabiya sa siudad.
Ginatun-an pa ini karon sang City Legal Office.
Pila sa mga nalakip sa amo nga guidelines amo ang online application sang mga travel requirements.
“So in general gin systematize ta lang agud to nga indi ma confuse ang aton nga mga bisita, indi ma confuse ang aton mga residents kag sa subong sini ang major sina da nga changes amo ang pag secure sang health certificate by travellers online,” suno kay Sorongon.
Kun maaprubahan na ini sang alkalde kag mabutang sa isa ka executive order sarang na ini mapatuman sa pagsugod sang bag-ong tuig.