Natukiban sang Environmental Management Bureau Negros Island Region nga polluted ang tubig sa creek malapit sa Sanitary Landfill sang Bacolod City sa Barangay Felisa matapos ang water testing nga ginpatigayon sang Hulyo 9 kag 20.
Ini bangud sa gina-alegar leakage sa landfill nga nagailig pakadto sa amo nga creek.
Bangud sini, ginpapanaugan na sang Notice of Violation sang EMB-NIR ang siudad bangud sa paglapas sang Republic Act 9725 ukon Philippine Clean Water Act.
Magluwas sini may isa pa gid ka Notice of Violation nga gin-issue ang siudad bangud sa pag-operate sang cell number 4 kag cell number 5 apisar nga wala pa ini sang Environmental Compliance Certificate ukon ECC.
Ginpapasa sang EMB ang siudad sang position paper sa sulod sang 15 ka adlaw matapos maserve ang notisya. Kinahangalan man nga mapaathag sang siudad kun ngaa indi sila dapat pagmultahan sang masobra 28,000 pesos tubtob 570,000 pesos sa kada adlaw bangud sa amo nga mga violations.
Subong nga hapon ginpatigayon ang public consultation para sa ECC sang cell number 4.
Antes sini nagpabutyag na ang mga residente sang Barangay Felisa kaupod ang mga Environmentalists Advocates nga ulihi na ang tanan bangud naga-awas na ang cell number 4.
Panawagan sang mga residente nga istriktohon ang pagpatuman sang RA 9003 ukon Solid Waste Management Act. Nagapamatok man ang mga ini sa posibilidad nga mapatuman ang Waste to Energy sa ila nga lugar.
[sibwp_form id=1]