Dugang nga mga medical personnel kag hospital supplies italana sa midway facility sang Bacolod agud mabuhinan ang pagdagsa sang pasyente karon nga halos puno na ang mga ospital.
Sa midway facility sang Bacolod ginadala ang mga Covid-19 patient antes pa man sila isulod sa mga ospital kag kun ma discharge na.
Karon nga nagakapuno na ang mga ospital bangud man sang pagsaka sang Covid-19 cases, plano sang siudad nga italana diri ang mga dugang nga mga medical personnel kag hospital supplies nga ila ginapaabot manggikan sa Department of Health 6 sa madasun nga semana.
Suno kay Dr. Edwin Miraflor, officer in charge sang City Health Office, kritikal na ang sitwasyon sang mga ospital sa Bacolod bangud magluwas nga yara na sa 86 porsyiento ang utilization capacity rate, ginakulang man ang mga medical personnel.
Gani dako nga bulig ang mapasanyug ang kapasidad sang midway facility para mapahagan hagan ang pagsaka sa Covid-19 cases kag deaths.
Sa midway facility man sa barangay alijis gina isolate ang mga healthcare personnel sang siudad nga nalatnan sang virus.