Wala pa magamit sang Bacolod City Disaster Risk Reduction and Management Office ukon CDRRMO ang 30 percent sang ila nga budget sini nga tuig nga yara sa 71 million pesos, bangud wala pa man sang mabaskog nga kalamidad nga nag-igo sa siudad.
Apang, kun magdeklara ang gobyerno nasyonal sang state of calamity antes magtakop ang tuig bangud sa epekto sang Super El Niño, gilayon man ini nga gamiton suno kay Dr. Anna Maria Laarni Pornan, pamuno sang DRRMO.
Kun wala sang deklarasyon sang state of calamity sini nga tuig, ang nabilin nga pondo sang DRRMO ang ipasulod sa Special Trust Fund sang siudad.
Samtang, sa P5.3 billion proposed 2027 annual budget sang siudad, isa sa may pinakadako nga allocation ang DRRMO nga yara sa 268 million pesos.
Ginsiling ni Pornan, nga mandu sang laye nga kinahanglan 5 percent sang annual budget ang makadto sa Disaster Fund. 30 percent sang budget sang opisina ang liwat nga italana para sa Quick Response Fund ukon para sa mga kalamidad samtang ang nabilin amo lamang ang pwede gamiton para sa disaster preparedness iniatives kag programs.
Miyerkules sang aga, nagsugod na ang deliberation sang proposed 2027 budget kun sa diin gintalakay ang 650 million pesos nga increase sa budget kun ikumpara sa sini nga tuig. Ini ang pinakadako nga increase sa annual budget sa maragtas sang siudad.
Magapadayon ang deliberation sang budget tubtob sa katapusan sang Nobyembre.
[sibwp_form id=1]