Gina lantaw man ang amat-amat na nga pagbalik sa normal, pero sa karon, luyag anay ni Negros Occidental Governor Eugenio Jose Lacson nga mag pabilin ang curfew sa Negros Occidental.
Sa idalom sang Executive Order 21-50, las dose sang gab-i tubtob las 4 sang kaagahon ang curfew para sa 18 anyos pasaka, 10pm – 4am naman ang para menor de edad sa Negros Occidental. Damlag pa, ginsiling ni provincial consultant Albee Benitez nga nagakaigo nga kakason na ang curfew bilang isa sa mga tikang sa pag balik na sa normal.
Suno kay Lacson, luyag niya nga lantawon anay kun ano ang mangin sitwasyon antes pa man kakason ang pagpatuman sang curfew.
Naga nubo naman ang kadamuon sang covid cases subong nga adlaw pero ang pagtatyuyon nga pag nubo suno sa gobernador maga depende sa gawi sang pumuluyo, labi na nga nagsugod na man ang campaign season kag may tuman nga pagdagsa.
Sa pihak nga bahin, gin sugdan na ang pag bakuna sa mga lgu sang kabataan nga yara sa 5 to 11 age group. May kaugalingon nga mga gimik ang tagsa ka lgu para mga kabataan nga yara sa amo nga pang-edaron.
Sa San Carlos City, bwas pa maga sugod ang ila nga pagbakuna, pero may rehearsal na bahin sa daw carnival nga ginhanda para sa mga kabataan.