Contempt order nga ginpapanaog sang House of Representatives batuk kay Silay City Legal Officer, Janus Jarder ang ginserbe sang PNP.
Suno kay Negros Occidental PNP Provincial Director, Rainerio de Chavez nabaton nila gikan sa House of Representatives ang contempt order kag ginserbe sadtong Enero 6.
Ugaling wala man sa ila balay si Jarder kag ang anak sini ang nagbaton sang dokumento suno kay de Chavez.
Napahibalo man nila ang LGU. Nakasaad sa order nga maga escort ang PNP kay Jarder padulong sa House of Representatives angut sa gin-file nga contempt sa iya, pero suno kay de Chavez wala man sang amo nga tion si Jarder.
Gin-cite si Jarder sang two counts sang contempt sang Committee on Public Accounts kag ginmanduan nga iga-detain sa lower house sadtong Disyembre sang nagligad nga tuig sang gina patigayon ang congressional inquiry angut sa gina alegar irregularities sa P1B nga infrastructure kag iban pa nga proyekto sang Silay.
Nag manifest sadto si Abang Lingkod Rep. Joseph Stephen Paduano nga ang detention ni Jarder maga sugod na Enero 6 para man maka holiday siya upod sa iya nga pamilya.
Gin-cite si Jarder sang contempt sa pagbinutig kag bangud man sang paglikaw sabat sa mga ginpamangkot sa iya sang mga committee members.
Gintinguhaan sang Digicast Negros nga makuhaan sang iya nga bahin si Jarder ugaling wala siya malambot.