Paagi sa ginpadala nga sulat sa konseho, ginhinyo ni anay city councilor Archie Baribar ang pag-cancel sang kasugtanan sang siudad upod sa Metro Towing Services para magpatuman sang Clamping kag Towing Ordinance sa siudad.
Suno kay Baribar, wala nag-agi sa bidding process ang towing service nga nakasaad sa Republic Act 9184 ukon Procurement Law.
Sa baylo ini ang natagaan sang otoridad paagi sa Memorandum of Agreement kag kun diin mas dako pa ang ginakuha nga percentage share sang private company sa collection fees halin sa mga na-issue nga violation kag citation ticket sang siudad.
Ginsiling ni Baribar nga ang ginpalab-ot niya nga request ang wala sang kaangtanan sa pag-tow sang salakyan nga gin-park sang iya anak sa kilid sang dalan sa University of St. La Salle sang nagligad nga Disyembre 15.
Paathag ni Councilor Al Victor Espino, pamuno sang Committee on Laws and Ordinances and Good governance, natagaan sang acreditation ang towing service paagi sa naaprobahan nga ordinansa.
Pati ang 25 percent monthly share sang siudad collection fee ang nakasandig man sa City Ordinance 338 nga ginpaboran man sadto sang anay konsehal.
Ginsiling man ni City Legal Officer Atty. Romeo Carlos Ting, Jr., indi exclusive ang paghatag accreditation sa towing service kag wala man sang nagasto ang siudad sa pagpatuman sang kasugtanan angut sa towing kag clamping operation.