Liwat nga ginpangkakas sang Bacolod City Legal Office Enforcement Team ang lima ka mga baligyaan sa atubang sang Corazon Locsin Montelibano Memorial Regional Hospital bangud nagasablag ini sa kilid sang dalan.
Ginsiling ni Levy Pangue, enforcement team leader, nga makapila na sila ka beses nga ginpahalin, apang nagabalik man sa gihapon. Bangud yara na mismo sa sidewalk ang mga stalls kag carts sang mga natungdan nga vendors, naga kapilitan na ang mga pedestrian nga sa dalan mismo mag-agi, butang nga delikado suno kay Pangue.
Samtang Miyerkules sang aga, nagsugod na ang clearing operation sang CLO sa mga area nga gin-identify na sang siudad nga pahamtangan sang mga flower vendors para sa tigkalalag.
Lakip sa mga vending areas amo ang sa gwa sang Libertad Public Market, Central Market kag ang sa atubang sang Burgos Public Cemetery kun sa diin ipatuman ang half road closure sumugod Huwebes, Oktubre 29.
May yara man sang designated area sa gwa sang Handumanan Public Cemetery para sa mga vendors. May ipatuman man nga one entrance, two exit policy sa patyo sa Handumanan para sa tigkalalag bangud wala sang malapad nga parking space malapit sa area.
Sa karun padayon nga ginapalastar sang Bacolod Transport and Traffic Manangement Department ukon BTTMD ang pagmando sang lakat sang traffic sa amo nga patyo.
[sibwp_form id=1]