PSSG Soberon photo
Gina kalipay kag gina abi-abi indi lamang sang mga apektado nga pumuluyo kundi pati man sang mga lokal nga opisyales ang pag nubo sa Alert Level 2 sang bulkan Kanlaon gikan sa Alert Level 3.
Gina kalipay ni La Castellana Mayor Añejo Nicor ang pag panaog sa Alert Level 2 sang bulkan labi na nga masobra man sa anum ka bulan ang pag tenir na sang mga apektado nga pumuluyo sa mga evacuation center.
Pero suno sa iya, maga sapol pa bwas ang Incident Management team upod man ang Office of the Civil Defense kag iban pa nga ahensya para ma planuhan ang pag decamp sang mga evacuees.
“Kabay pa magbalik na gid ang normal nga sitwasyon sang akon di affected nga barangay, especially sa Barangay Cabagnaan. Nakita ta naman nga almost 6 months gid ang ila sakripisyo sa ila nga panggawi, sa ila nga panimalay. Ako nalipay gid. Kabay updan naton pangamuyo”, suno kay Nicor.
Ginapaabot bwas matigayon ang pag decamp sa Canlaon City evacuees.
Suno kay OCD Regional Director Donato Sermeno, III, may 4,160 ka mga evacuees gikan sa La Castellana, Bago City, Canlaon City kag La Carlota ang naga pabilin sa evacuation centers sa karon kay ini sila ang sakop sang 6km danger zone.
Kun matigayon gid man ang pag decamp sa ila sini nga semana, gina paabot nga ang mabilin sa mga evacuation center ang yadto na lamang ang mga naga puyo sakop sang 4km permanent danger zone.
Sa La Castellana suno kay Sermeno, mga 137 ka indibidual ang yara sa 4km permanent danger zone kag sa Canlaon City naman 167 ka pumuluyo.
May 22 ka pamilya sa Bago City nga indi sakop sang 4km PDZ pero naga istar sa geologically isolated nga mga lugar gani gina abisuhan man sila nga indi mag balik sa lugar.
Sa masobra 3,800 ka pumuluyo nga pwede na makabalik sa ila nga puluy-an kay yara na sa Alert Level 2 ang bulkan, suno kay Sermeno, may yara sang nag pahibalo nga luyag anay nila mag pabilin sa mga evacuation center – ang iban luyag mag pa relocate na lang, ang iban nagkalaguba na ang balay.
Maga padayon ang assistance sa ila suno sa OCD.
“Ang sa LGU ang may prerogative pero we strongly advise sa LGUs nga indi na pabalikon, kay daku naman na nga problema sa ila, anyway manageable na nga number, kayang kaya na i-sustain, (when ma start ang pag decamp sa 6KM?) as soon as ang ila demobilization plan ma plastar”, suno kay Sermeno.
Ginsiling ni Negros Occidental Governor Eugenio Jose Lacson nga nag tuon na sila sang leksyon sa natabo.
Pursigido ang probinsya para sa permanent relocation sang indi lamang yara sa 4km danger zone kundi pati naman ang sakop sang 6km extended danger zone.
Gina hikot na ang pagbakal sang duta nga mga serbe relocation site.