Bureau of Fire Protection nagapanawagan sa publiko nga likawan ang pag panutod bangud sang sunod-sunod nga mga kaso sang grass fire.
Lunes sang hapon, halos dululungan ang lima ka grass fire incidents sa siudad sang Bacolod nga gin-respodehan sang Bureau of Fire Protection.
Kalabanan sa kabangdanan sang sunog amo ang pag panutod kag mga ginapanghaboy nga mga sigarilyo sa mga kahilamunan.
Ginsiling ni Bacolod City Fire Marshall Fire Inspector Jenny Mae Masip, indi mag nubo sa duha ukon tatlo ka grass fire incidents ang ila gina respondehan kada adlaw.
Ini man ang rason nga ginpatuman na nila ang “Controlled Burning Program” agud malikawan ang amo nga mga insidente.
Dugang pa niya, may mga naka stand by na nga mga fire trucks sa mga areas nga gin-identify sang BFP nga masami may nagakatabo nga grass fires, lakip na ang Reclamation Area.
Nagapanawagan ang BFP sa pumuluyo nga likawan ang pagpanutod bangud kun mapabay-an ini, dako ang posibilidad nga magtuga ini sang sunog, ilabi na nga mala na katama ang mga hilamon sa palibot.
Sandig sa Republic Act 9003 ukon ang Ecological Solid Waste Management Act, iligal ang pagpanutod sa mga open nga lugar.
Ginmanduan naman ni Mayor Greg Gasataya ang City Legal Office, Environment and Natural Resources, kag mga barangay nga bantayan kag sawayon ang mga nagapanutod nga ila makit-an.
[sibwp_form id=1]