Nagpinaligo sa Himogaan River, sakop sang Purok Arophag, Barangay Malubon, Sagay City ang lima ka mag-classmates Biyernes sang hapon.
Suno sa saksi, gulpi lang nagbaskog ang daludo sang tubig rason nga na-trap ang mga estudyante sa tunga sang suba.
Duha sa ila ang naanod samtang tatlo ang nakaluwas matapos nga makalangoy pahigad.
Nagpatigayon sang search and rescue operations ang katapo sang coast guard, barangay, local rescue team kag volunteers.
Matapos ang duha ka adlaw, tigayon nga nakit-an ang mga bangkay sang estudyante nga 16-anyos kag 15-anyos.
Ang isa ka bangkay ang nakit-an sang Domingo sang aga sa pangpang nga sakop sang Purok Jordan, Barangay Fabrica sa Sagay, mga pito ka kilometros ang kalayuon sa ginluntaran sang insidente.
Samtang ang isa naman ang nakit-an kagab-i sa area sang Sitio Ducol-ducol, Barangay Himogaan Baybay sa Sagay.
Positibo nga ginkilala sang ila tagsa ka mga pamilya ang duha ka mga biktima.
Pareho nga Grade 10 students ang mga biktima sa Eusebio Lopez Memorial Integrated School.*