Bacolod City magasugod sang 4-day work week sa madason nga semana

Ginpirmahan na ni Bacolod City Mayor Greg Gasataya sini nga hapon ang Executive Order number 015-2026 nga nagapatuman sang flexible work arrangements ukon 4-day work week schedule sa mga talatapan sang gobyerno sa siudad sumugod sa Lunes, Marso 16.

Sandig sa amo nga mando sang alkalde, wala sang trabaho kada Byernes nga adlaw ukon Lunes tubtob Huwebes lamang mangin bukas ang mga talatapan sa siudad.

Apang kinahanglan sa gihapon nga magdangat sa 40 hours ang duty sang mga empleyado kada semana. Sa baylo, las 8 sang aga tubtob las 7 sang gab-i na ang bag-o nga schedule sa sulod sang 4-day work week.

Wala naman madala sa amo nga mandato ang mga talatapan nga nagadul-ong sang essential services kaangay sang City Health Office, City Engineer’s Office, Department of Social Services and Development, Disaster Risk Reduction and Management Office, Environment and Natural Resources Office, kag General Services Office.

Ginsiling ni Gasataya nga apesar sang pag-patuman sang amo nga schedule, bukas sa gihapon bisan ano nga oras ang Help Desk para sa mga concerns sang mga Bacolodnon Overseas Filipino Workers nga yara sa luwas ilabi na sa Middle East.

Samtang, lima ka adlaw sa gihapon ang klase sa tanan nga mga pampubliko nga buluthuan sa siudad.*

[sibwp_form id=1]