Sumugod sa maabot nga Lunes, Oktubre 26, indi na magbaton ang Bacolod City Health Office sang mga pasyente nga may ginabatyag nga mga sintomas sang COVID-19.
Suno sa executive director sang Bacolod Emergency Operations Center kag City Administrator nga si Em Ang, ini agud malikawan nga malatnan sang virus ang mga nagabusong nga iloy nga nagapakonsulta sa Lying-In clinic sa sulod sang compound sang Bacolod CHO.
Gindugang pa ni Ang, may mga nabaton sila nga report nga may mga nagabusong nga mga iloy nga nagpositibo sa virus kag ini ang indi nila luyag nga matabo.
Ang mga pumuluyo nga nagabatyag sang mga sintomas sang COVID-19 kasubong sang ubo kag hilanat ang mahimo nga makapakonsulta sa Bacolod Respiratory Out-Patient Center nga nahamtang sa BAYS Center.
Nagaplano man ang Bacolod EOC nga magsapul sa Philippine Obstetrics and Gynecologist Society kun paano pa gid mapangapinan ang ikaayong lawas sang mga nagabusong.