Site icon Digicast Negros

38 anyos nga lalaki nga under probation patay sa shooting incident sa Brgy. Mandalagan

Naalarma ang mga residente sang sunod-sunod nga lupok sang pusil sa kilid sang kampo sa Villa Lucasan Subdivision sa Barangay Mandalagan las otso kwarenta kaina sang aga.

Pila sa ila kinulbaan sang makita ang bangkay sang biktima nga ginkilala nga si Francis Mark Rito, 38 anyos nga nangayaw sa lugar.

Sa pagpang-usisa sang katapo sang Police Station 3, naga maneho sang motorsiklo si Rito papauli kuntani sa Barangay Bata sang ginbalabagan siya sa alagyan sang wala makilal-an nga mga lalaki kag gintiru sang maka-apat ka beses.

Na recover sa crime scene ang apat ka mga slug kag isa ka empty shell sang wala pa mapat-ud nga calibre sang pusil.

Si Rito ang under probation sa kaso nga theft. Siya man ang ginatudlo responsable sa pagpatay sa isa ka drug personality nga nangin ka-live-in sang iya karon nga karelasyon suno sa PNP.

Malapit lang sa eskwelahan kag sa mga pamalay ang natabuan sang insidente. Gani ginatinguhaan man sang kapulisan nga makakuha sang mga CCTV footage agud mapat-ud kun sin-o ang responsable sa pagpatay sa biktima.

Skip to toolbar