Nagdangat na sa 27 ka mga bata nga nagatenir sa dalanon ang tigayon na nga na-rescue sang Bacolod City Anti-Mendicancy Division sang Department of Social Services and Development humalin Enero sini nga tuig.
Ginsiling ni DSSD Head Richelle Verdeprado-Mangga, nga 17 sa mga na rescue ang ila na gin-refer sa mga centers kag foundations sa siudad samtang ang iban naman ang ginbalik sa ila mga pamilya.
May mga na rescue man sila nga mga months old palang nga mga bata nga yara man nagatenir ang ginikanan sa higad sang dalan.
Suno sa iya, dako nga pagpanghangkat sa siudad ang pagbalik-balik sang mga bata sa dalan bisan makapila na nila ka beses nga na rescue ang mga ini.
Nagapaandam man ang siudad sa mga ginikanan nga nagapabaya sa ila mga kabataan nga posible sila makuhaan sang parental authority kag mahatagan sang nagakaigo nga penalidad kon mapamatud-an nga wala nila ginaobra ang ila oblisgasyon sa ila mga kabataan.
Sang martes sang aga, may isa naman ka 9 anyos nga bata nga naga-gamit sang inhalant ang na-rescue sang DSSD sa idalum sang Metrodome sa Barangay 39.
Damlag pa, diri man na-rescue ang tatlo ka mga rugby boys nga naga edad 11, 13, kag 17 anyos.
Suno sa DSSD, lunsay mga taga Barangay Singcang-Airport ang apat tanan ka mga kabataan.*
[sibwp_form id=1]