Kun basehan lang ang CCTV footages nga nakuha sang PNP, wala sang riding-in-tandem nga involved sa natabo nga shooting incident sa Bangga Tomaro, Brgy.Sum-ag sa Bacolod, Biyernes sang gab-i.
Suno kay Police Captain Andy Ofalia, Station Commander sang Police Station 9, ila pa gina hulat ang resulta sang ballistic examination, cross matching examination kag bullet trajectory examination. Gani ang tanan nga mga alegasyon may angut sa natabo ang indi pa makumpirma sa karon.
Suno sa PNP, Biyernes pa sang gab-i napatay ang pasahero nga si Carmelita Davila.
May igo siya sang bala sa kilid. Sabado naman sang hapon napatay ang naga dala sang pick up kag live-in partner ni Davila nga si Federico Gayagas Jr., anay punong barangay sang Bacong, Bago City. May igo naman siya sang bala sa ulo.
Dugang pa ni Ofalia, sa mga CCTV footages nga ila nakuha, wala sang may nakita nga mga “external forces” kag tayuyon lang man nga nagpondo ang puti nga pick up nga gina sakyan sang duha sa higad sang karsada.
Na-recover sang PNP sa sulod sang salakyan ang isa ka 9mm pistol, isa ka M16 armalite rifle, grenade launcher, mga bala kag magazine sang 9mm kag M16 kag 40 ka bala sang grenade launcher.
Suno sa pulis, may yara sang lisensya ang narekober nga 9mm pistol samtang wala sang may nakuha nga dokumento ang kapulisan sa M16 rifle.
Ginahibalo pa kun ngaa may amo sini nga mga armas ang anay punong barangay.