Pagdula sang budget sa pila ka mga items sa idalom sang Sangguniang Bayan sang Moises Padilla ginareklamo sang Vice Mayor.
Pag slash sang 2024 budget sang banwa suno sa iya wala sang legal nga basehan. Suno kay Vice Mayor Ian Villaflor, 197,494,794 pesos ang proposed budget sang banwa nga natigayon approve sa second reading sadtong November 29. Sang Third and Final Reading na sang December 6, gin-move sang katapo sang SB ang pag slash sang 2,149,998 gikan sa 197.4 million nga proposed budget.
Suno kay Villaflor, wala sang legal nga basehan ang amo nga tikang, sandig sa ila nga internal rules. Paathag niya, indi na pwede ang deliberation ukon pag slash sang budget sa third and final reading bangud pagboto na lamang ang ginatugot sa amo nga tion. Apektado sa budget slash ang iban man nga departamento kaangay sang Accounting, Budget kag Treasurer’s Office. Pero ang natam-an ang SB.
Ehemplo diri ang 1.3 million pesos nga budget para sa Salaries and Wages nangin piso na lamang, ang budget sa fuel nga 200,000 pesos, piso naman. Ang Maintenance and Other Operating Expenses nga 850,000 pesos nangin 250,000 pesos na lamang kun sa diin 100,000 sini paagi sa resolution, ang para sa pamahaw sa kada mag session kag ang 150,000 para sa Vice Mayor’s League nga fees.
Naghinyo na siya sang opinion sang DILG kag ginsiling man sang DILG suno sa iya nga indi pwede ang slashing sang budget sa third and final reading.
“Ang akon gina question, may ara kami reading principles sa amon internal rules nga ang third and final reading wala na amendment, wala na deliberation, casting of votes na lang, nominal voting. Ang question ko na lang sulat ko sa DILG kay gin bayolar nila ang internal rules”, suno kay Villaflor.
May Committee hearing man nga ginpatigayon ang Sangguniang Panlalawigan kag suno sa bise-alkalde ang resolution sini ang iya nga gina hulat.
“Nagahulat ko sang resoltuion sang SP kun ano ang resulta sang Committee hearing. Depende sa SP kun ano
ang matabo sa amon budget”, suno sa bise-alakalde.