Natigayon na ang una nga public hearing para sa Negros Bulk Water Supply Project sa Malogo River sa EB Magalona.
Para sa Bise Alkalde sang banwa, kun ano ang mangin panindugan sang publiko amo man ang mangin panindugan sang LGU.
Sa Brgy San Isidro sa EB Magalona gin patigayon ang public hearing sang Miyerkules, Mayo 20. Suno kay Vice Mayor Marvin Malacon madamo ang nangin palamangkutanon nga kinahanglan sabton sang project proponent.
Gani suno sa iya mas maayo nga may ika duha pa gid nga round sang public hearing. Nahangpan niya nga daku ang mabulig sang proyekto sa pumuluyo pero ang mga concerns dapat man nga mahangpan sang pumuluyo.
“Akon ya suggestion, we need to have a round 2 here in the public plaza kag ang pamangkot sang pumuluyo i-address nila. I-address naton. I want to be transparent. At the end of the day, I understand this project, daku gid ni mabulig sa pumuluyo. Pero dapat ang tanan nga concern dapat ma intindihan sang pumuluyo”, suno kay Malacon.
Ang Environmental Management Bureau NIR amo ang nagpatigayon sang public hearing. Suno kay EMB Director Vicente Losbañes ang environmental protection, water resource management, kag ang potential socioeconomic impact sang host community kag mga adjacent areas nalakip sa mga gintalakay.
16 million liters per day ang tuyo nga ma-source gikan sa Malogo River. Isa sa mga pamangkot suno sa EMB amo ang epekto man sini sa supply sang tubig sa area, lakip na sa watershed kag epekto man sa agrikultura.
Gintalakay man ang ditribution arrangement kag long-term financial sustainability.
May isa ka LGU suno sa EMB nga nag pabutyag sang ila sini nga reservation kag naghinyo sang separado nga public hearing.
Suno sa EMB nasabat man sang mga tiglawas sang probinsya ang mga ginhaboy nga pamangkot paagi man sa Environmental Impact Statement kag mga supporting studies.
Ang public hearing ang kabahin sang mga requirements sa pagkuha sang Environmental Compliance Certificate nga isa man sa mga kinahanglanon para matigayon ang proyekto.
“Ang purpose sang hearing is to come up with the ECC. And then ma gather naton ini kun bala may mga naga oppose sini ukon wala. So that is the requirement sa processing sang aton Environmental Compliance Certificate prior kami mag issue sini. May ara gid sila RONO kag Zoning pa gid. Amo na ang gina work out ni province ang mga nag come out nga questions, i-resolve ni province before kita mag proceed sa next public hearing”, suno kay Losbañes.*
[sibwp_form id=1]