Bise alkalde sang banwa sang Moises Padilla kag kaupod nga konsehal nga naga pangatubang sang kaso nga murder ang nagsungka Miyerkules sang aga sa talatapan ni Vice Governor Jeffrey Ferrer.
Suno sa bise gobernador, nagpakig angut kanday Vice Mayor Adrian Villaflor kag Councilor Jimmie Don Plaza sa iya angut sa ila nga plano nga mag sungka rason nga iya gin facilitate ang ila nga pagsurrender sa National Bureau of Investigation.
Kaupod sang duha ka mga opisyal ang ila abogado sa ila nga pagsungka sa presensya man ni NBI agent-in-charge Atty Renoir Baldovino.
Yara ang duha sa custody sang NBI pending sang mangin desisyon sang korte sa iga file sang ila nga abogado nga motion para sila ang maka piyansa. Sa karon iga process anay sang NBI ang pagbalik sang warrant of arrest sa RTC La Carlota karon nga yara na sa ila nga custody ang duha.
Sanday Villaflor kag Plaza ang ginpapanaugan sang warrant of arrest angut sa pagpatay sa anay konsehal nga si Jolomar Hilario sang 2019.
Sang Agosto 27, nagsungka si Councilor Vincent Garcia. Antes sa iya nagsurrender man si Councilor Jose Morito Flores kadungan kanday punong barangay Felisa Villaflor kag bana nga si Jonathan.
Nadalahig man sa amo nga kaso si Mayor Ella Garcia-Yulo pero wala siya napapanaugan sang warrant bangud yara siya sa presohan sa amo nga tion.
Kun bala ginpatu patuan lang ang mga opisyales suno kay Ferrer ang ebedensiya na sa korte ang magapamatuod sini.
Samtang, naka leave na damlag pa ang bise alkalde kag mga konsehal nga natungdan.
“So, indi man siling nga manago na lang sila. Let the court decide kay ara na man sa korte. So, mas maayo man gani nga indi sila at large or indi sila fugitive sa ila nga kaso. Indi pa na sila convicted kay wala pa man gani decision,” suno kay Ferrer.
“Through the efforts of the vice governor, ay nag-surrender sila sa opisina nila and they decided na i-turn-over sila sa amin, sa NBI for their custody. They are under detention po,” suno kay Baldovino.