Technical Working Group nagapaandam sa katapo sang transport sector batuk sa peke nga mga dokumento sa pagkuha sang extension sang provisional authority.
Ginsiling ni Jun Asis, secretary general sang Sentrong Samahan ng mga Tsuper at Operators Negros ukon SSTONE nga may pila ka mga applications para sa extended provisional authority ang gina-usisa karon sa Land Transportation Franchising and Regulatory Board Regional Office matapos may isa ka franchise permit ang natalupangdan nga ginpeke.
Suno sa katapo sang natukod nga technical working group sang Bacolod LGU, wala nag-agi sa ila ang mga documento kag wala ini sang endorsement halin sa siudad.
Gani nagapaandam sila sa pila ka mga driver/operators nga indi basta isalig ang ila mga applications para sa extended PA sang mga traditional jeepney.
Ang grupo sang SSTONE kag Federation of Bacolod City Drivers Association ang nagsugod na proseso sang extended PA agud nga makapadayon sila sa pagbyahe tubtob Disyembre 31.
Luwas sa ila may pila man ka transport group ang nagproseso sang application nga wala sang endorsement gikan sa siudad.