Indi ginakinahanglan ang pagpatuman sang border closure sa probinsya sang Negros Occidental lakip na sa Bacolod City karon nga may kumpirmado na nga kaso sang monkeypox sa Western Visayas.
Suno kay Mayor Albee Benitez nga sa ila paghinun-anun ni Governor Eugenio Jose Lacson, nakasugtan ang pagtalana sang dugang nga personnel sa mga sea port kag airport para sa hugot nga monitoring sang mga pasahero.
Kasubong sang mga tikang sang nag-peak ang Covid 19 pandemic,maga install man sila sang dugang nga mga thermal scanners agud mapabaskog ang pagbantay kontra sa monkeypox.
Ang Bacolod City Health Office ang nagtalana na sang separado nga isolation facility sa Midway facility sa Barangay Alijis para sa posible malatnan sang monkeypox.
Magasapol naman ang mga municipal kag city health officers sang mga banwa kag siudad sang probinsya upod sa Provincial Health Office sa Huwebes agud mapatpat ang mga protocol angut sa monkeypox.
Ginkumpirmar sang Department of Health 6 nga isa ka 25 anyos nga lalaki nga taga Iloilo Province ang ikaapat nga kaso sang monkeypox sa pungsod.