Humalin sang nagpeak ang Covid 19 pandemic naninghua ang grupo sang mga volunteer group upod sa Barangay 18 agud nga matukuran sang temporary shelter ang mga pasyente kag mga himata nila nga nagaserbe watchers sa gwa sang Corazon Locsin Montelibano Memorial Regional Hospital.
Si Myna Mariposque sang Barangay Dian-ay sa Escalante City ang masobra na isa ka bulan sa shelter sa may 2nd road sakop sang barangay 18 sa Bacolod.
Ang iya anak nga bag-o panganak upod man sa iya apo ang nagapabilin nga iya ginabantayan sa regional hospital.
Apang isa siya sa malapit kwarenta ka mga nagatinir sang libre sa shelter nga karon nabalaka samtang amat amat nga gina demolish ang shelter nga iya ginatiniran.
Sang Martes lang nag abot sa shelter si Mario Andalicio kag ang iya misis nga natalana magpa opera sang nagahabok niya nga guya sa regional hospital.
Nagalaum siya nga kuntani makatinir pa sila sa shelter agud indi man sila maiyawan balik-balik sa ila balay sa Barangay Malingin sa Bago City.
Suno kay Punong Barangay Madeline Diaz, sang Pebrero pa nagtakop ang kontrata sa tunga sang barangay kag sang tag iya sang duta nga gina tindugan sang shelter.
Indi naman masarangan sang barangay ang balayran sa tubig kag kuryente sa sulod na sang halos duha ka tuig.
Gani sa katapusan sang Hulyo indi na mapadayon sang barangay ang pagbulig sa mga nagakinahanglan,kadam an diri sa ila indi taga Bacolod.
Si Councilor Claudio Puentevella nagsiling nga magasugilanon siya sa tag iya kag sa iban pa nga mga donors agud bisan paano mapabilin ang shelter para sa mga pasyente kag watchers sang regional hospital.
May mga local government unit kag congressional districts naman nga nag renta sang mga lugar nga temporaryo nga matiniran sang ila mga kasimanwa.
Ang pag regulate sang mga watchers kabahin sa mga tikang sang pamunuan sang regional hospital agud nga mapaiway ang paglaton sang Covid 19 ilabi na sa mga medical personnel.
Gani kada adlaw makita man ang malaba nga linya sang mga pasyente kag watchers sa gwa lang sang ospital.