Paglapas sa Presidential Decree 1612 ukon ang Anti-Fencing Law ang kaso nga gina atubang sang technician nga nagbakal sang cellphone gikan sa duha ka hold-up suspects nga nang biktima sa isa ka doktora sa Barangay 19, Bacolod City sadtong Mayo 28, 2026.
Ginsiling ni Bacolod City Police Office Director Police Colonel Eugene Rebadomia, nakuha mismo sa balay sang technician ang isa ka unit sang Iphone 17 Pro kag Samsung Galaxy A55 5G nga nakawat sang duha ka hold-upper sa biktima.
Ginkilala ang technician nga si alyas Joenel, taga Barangay 14, kag nagabaligya ini sang mga cellphones sa downtown area.
Dugang ni Rebadomia, ila na sa karon ginatutukan ang mga nagabaligya sang cellphones sa downtown agud sigurohon nga indi ini mga kinawatan kag kun may mga business permit sila.
Isa sa mga rason kun ngaa nagadamo ang kaso sang kinawatay sa siudad, amo ang madamo man nga mga technician ang nagabakal sang mga kinawatan nga gadgets.
Una na nga nadakpan ang duha ka suspek nga si alyas Rem kag alyas Shan.
Magluwas sini, may isa pa ka persona ang natalana nga pasakaan sang kaso may kaangtanan man sa amo nga insidente.
Wala pa ginpagwa sang kapulisan ang identity kag kon ano ang kahilabtanan sang amo nga persona sa pag hold-up sa doktora.*
[sibwp_form id=1]