Sa video nga kuha ni Emmanuel Villarenia makita ang ini nga balay nga natumba matpos matiphagan sang duta…
May mga pumuluyo nga gin hingagaw pang rescue kag gindala sa evacuation center.
Ang duta nga natiphag diri nag halin sa likod lang sang balay sang pamilya Demapanag sa Sitio Dayap, Barangay Patag sa Silay.
Ang ila nga balay ginpang kaksan anay nila sang mga bentana kag puertahan, para kun matiphag gid man ang duta, may mga nasalbar pa sila nga mga parte sang balay.
Ang mga dingding sang ila nga balay may mga dalagko nga lubid kag gin higot ini sa puno man sang mangga sa atubang sang ila nga balay
Martes sang aga amat amat nga natiphag ang duta sa likod nila balay, mga pila na lang ka tikang dingding na sang balay nila nga sang Disyembre lang napatukod.
Nakibot sila sang maka bati sang daguob. Natiphag na gale ang duta.
Dako ang pagpasalamat ni gina nga bangud sang ugat sang puno sang mangga, wala natiphag ang duta sa idalom sang ila nga balay.
Isa sila sa 29 ka mga pamilya nga nag evacuate sang kahapon.
Suno sa isa man sa mga residente daw balod ang tubig nga nagaka hulog.
Sa Sitio Lantawan naman sa Barangay Guimbalaon temporaryo nga indi malabyan ang highway kay nagtiphag man ang duta.
Humalin kahapon masako ang taga City Engineers Office sa pag hakot sang mga duta nga nag tabon sa dalan.
Suno sa isa sa mga residente nga si Alma Garcia saksi sila sa maka apat ka beses nga amat amat nga pagtiphag sang duta.
Suno sa kay OIC City Engineer Elmer Kent Torres may gin report man nga landslide sa hinalinan sa lantawan. Nagtiphag man ang duta sa tubang mismo sang isa ka cafe diri man sa Linanatawan.
Ang ini kuno nga bahin sang sitio lantawan ang makabig nga landslide prone area. Sang nagligad nga tuig, nagtiphag man ang duta sa sini nga parte sang highway.
Humalin pa sang kahapon ang ila clearing kinahanglan abe kuno nga kakson ang lutak nga yara sa dalan kay delikado.
Malabyan na ang dalan sang mga salakyan kag ang mga nag evacuate ang nagbalik naman sa ila nga balay. Pero kun mag ulan, naka handa na sila nga gilayon magbiya sa ila nga mga balay.