May pito ka mga persona nga gin isyuhan sang citation ticket sang Task Force Disiplina sa Bacolod City sa una nga adlaw nila nga paglibot sa pagpatuman sang ordinansa nga nagamando sa pagsuksuk sang face shield.
Suno sa pamuno sang task force nga si Wilfredo Geolingo, ang pito ka mga persona ang wala sang bitbit nga face shield sa mga pampubliko nga lugar kag lunsay indi mga pumuluyo sang Bacolod.
Ginpahayag man ni Geolingo nga madamo sa gihapon sang mga pumuluyo ang wala nagasuksuk sang face shield kundi ila lamang ini ginasulod sa ila nga bag, ginakapyutan ukon ginabutang sa ibabaw sang ila ulo.
Gani sila ang ginpaandaman lamang sang task force nga dapat isuksuk gid ang face shield sang eksakto agud nga indi malatnan sang COVID-19.
Sandig sa ordinansa, may yara sang multa nga dos shentos pesos ang wala gasuksuk sang face shield kun taga Bacolod kag tres shentos pesos naman kun indi taga Bacolod.
Gindugang pa ni Geolingo nga mahimo kinahanglanon pa nga palawigon ang information dissemination sa publiko tuhoy sa mandatory nga pagsuksuk sang face shield sa siudad.