P3,000 pesos ang ginmulta sang City Legal Office kag Bacolod Environment and Natural Resources Office sa tag-iya sang salakyan nga nakuhaan sang video nga naghaboy sang basura sa Reclamation Area.
Ini matapos nga natukiban sang Land Transportation Office nga taga Barangay Bata ang tag-iya sang amo nga truck. Nagpasiguro man ang LTO nga magahatag man sila sang show cause order sa tag-iya.
Sa pihak nga bahin, nakilal-an man ang isa ka persona nga nag-ula sang iya basura sa Sulom Creek sa Barangay Mandalagan. Sandig sa imbestigasyon, staff ini sang isa ka eskwelahan nga malapit sa creek.
Ginsiling ni Mayor Greg Gasataya nga ginpasiguro man sang amo nga eskwelahan nga indi na matabo liwat ang amo nga insidente. Personal man nga nagpangayo sang pasaylo ang ila nga staff sa talatapan sang siudad.
Nagbutang na ang siudad sang dako nga signage sa amo nga creek agud malikawan ang parehas sini nga insidente.
Base sa City Ordinance No. 596 kag Republic Act No. 9003 ukon Ecological Solid Waste Management Act sarang nga mamultahan ang isa ka indibidwal nga madakpan nga nagahaboy sang basura sa mga indi designated areas.*
[sibwp_form id=1]