Gintiro sa ulo sang armado nga mga lalaki ang 74-anyos nga babaye sa Purok Halimbawa, Barangay Tapi sa Kabankalan City, Martes sang gab-i.
Ang biktima amo si alyas “Leonor”. Siya ang tag-iya sang balay kun sa diin may pito ka mga katapo sang New People’s Army ang nagkalamatay sadtong Abril 27, 2025.
Nag-gwa sa imbestigasyon nga pasado las 7 sang gab-i, may nag-abot nga tatlo ka mga armado kag namangkot sa bana ni “Leonor” kun diin ang iya asawa.
Gin-updan sang bana nga si alyas “Mar” ang mga lalaki sa balay sang utod ni “Leonor”.
Ginpasulod sang mga lalaki si alyas “Mar” sa balay samtang ginmandu-an si “Leonor” nga magkadto sa balkonahe. Didto may nabatian sila nga lupok sang pusil kag ila nakit-an ang biktima nga natumba na kag may igo sang bala sa agtang.
Narekober sa crime scene ang basiyo sang 9mm.
Ginsiling ni Lt. Col. Gary Alan Resuma, hepe sang Kabankalan City PNP nga nagapabilin nga unidentified ang tatlo ka mga suspek kag padayon pa ang ila imbestigasyon sa insidente.
“Kay gin-guide man sila sang bana. Kay ang iya bana ang ginpamangkutan, unknowingly nga amo to gali ang himuon sang tatlo ti gin-updan niya to sa balay. So pagka-diretso didto, tiniro nila dayon”, suno kay Resuma.*
[sibwp_form id=1]