Sa video nga kuha sang isa ka residente sang Canetown Subdivision sa Victorias City malapit lang sa sentral, makita ang naga daba-daba nga kalayo kag naga puog nga aso samtang may mga naga inabot nga firetruck.
Naga sige man huni ang alarm sang sentral.
Sa statement sang VMC ila ginsiling nga mga las 6:40 sang gab-i nag sugod ang kalayo kag mga 8:50 napalong ang kalayo.
Masobra sa duha ka oras ang ginlawig sang sunog.
Sa video nga kuha sang Amity Volunteer Fire Brigade, makita ang naga kasunog nga kalamay sa sulod sang warehouse.
Sa video naman ni Jha-Jha Mombay sang Chamber Volunteer Fire Brigade, makita nga gina tinghuaan sang mga fire volunteer nga mapalong ang kalayo nga nga sunog sa kalamay sa sulod sang warehouse.
Ginkinahanglan pa ang bulig sang mga fire volunteers gikan sa Bacolod kag mga bombero sa kaiping nga mga LGU para mapalong ang kalayo sa sulod sang sentral.
Sa impormasyon nga nabaton sang Digicast Negros, sa clinic nagsugod ang kalayo kag naglapta sa warehouse sang kalamay.
Si Victorias City Mayor Javi Benitez nagpadulong man sa lugar para makita ang kadako sang halit sang kalayo sa sentral.
Wala naman sang may nasamaran sa nagluntad nga sunog.