Ang “Sugar Cultural Landscape of Negros Occidental” ang opisyal na nga nalakip sa “Tentative List of UNESCO World Heritage Sites”.
Ang amo nga milestone ang ginpahayag ni Negros Occidental Governor Eugenio Jose Lacson sa iya nga inaugural address sang Martes sa inaugural session man sang Sangguniang Panlalawigan.
Suno sa gobernador ang amo nga pagkilala panugod lamang kag tinguhaan sang probinsya nga ang landscape sini nga na dihon sang maragtas, mga ginpanubli, kasubong man ang pag pangabudlay ang maka kuha sang amo nga pagkilala gikan sa UNESCO.
Dugang pa ni Lacson ang turismo sa Negros Occidental ang padayon nga naga tin-ad. Sa nagligad nga duha ka tuig, naka record sang padayon nga double-digit growth bahin sa visitor arrivals ang probinsya.
Gina tutukan ang turismo indi lamang bilang sa bahin sang cultural showcase kundi bilang economic driver nga naga hatag sang trabaho, naga tib-ong sang local enterprises kag alagyan para mapakilala sa bug-os nga kalibutan ang istorya sang Negros Occidental.
Sa sini nga bulan suno kay Lacson iga lunsar ang Culture Hub Tours.
Ini ang kabahin sa pag promote sang local heritage kag pag highlight man sang tourism destinations para sa mga turista.