Isa ka soltero ang gindakop matapos nagpanumbag sang pulis kag nanghaboy bato sa patrol car sang Hinigaran PNP sa Santo Rosario Subdivision, Barangay Nanunga sa banwa sang Hinigaran.
Nagresponde ang kapulisan sa lugar matapos makabaton sang report angut sa alarm and scandal kung diin gin-alegar naga-eskandalo kag ginamaltrato sang 21-anyos nga si alyas “Raco” ang iya iloy.
Ginsumbag sang suspek sa nawala nga mata ang isa ka nagresponde nga pulis nga may ranggo nga Corporal, kag ginhaboyan bato ang patrol car sang Hinigaran PNP, rason nga nabuka ang windshield kag side mirror sini.
Gindakup kag gin-rikisa ang suspek, kun diin nakuha sa iya bulsa ang duha ka mga pakete sang suspected shabu.
Ginpaidalum sa drug test ang suspek kag base sa resulta, positibo ini sa pag-gamit sang iligal nga droga.
Sa karon, detained ang suspek kag siya ang napasakaan na sang kaso nga malicious mischief, direct assault, damage to government property kag violation sang Republic Act 9165 ukon Comprehensive Dangerous Drugs Act of 2002.*