Siudad sang Bacolod may yara sang pending nga request sa DOH Regional Office para sa dugang nga healthcare workers karon nga nagasaka ang kadamuon sang mga hospital personnel nga nalatnan sang Covid-19.
May sinkwenta tanan ka mga doktor, nurse kag iban pa hospital personnel sang Corazon Locsin Montelibano Memorial Regional Hospital sa Bacolod ang nalatnan sang Covid-19.
Tungod sini limitado lamang sa extreme emergency cases ang pwede sa admission sa non-Covid area sang department of pediatrics sang ospital.
May pito man ka mga personnel sang Teresita Lopez Jalandoni Memorial Provincial Hospital ang nalatnan sang virus.
Nagapati si Em Ang, executive director sang Bacolod Emergency Operations nga may mga tikang na nga ginahimu ang mga ospital agud mapunggan ang paglapta sang virus kag indi man maapektuhan ang pagserbisyo sa mga pasyente.
Yara sa masobra 30 porsyiento ang capacity utilization rate sang healthcare system sa siudad.
Pero may yara na sang pending nga request ang City Health Office para mapabilin sa Bacolod ang 40 ka mga healthcare personnel nga ginpadala sadto sang DOH Regional Office 6.
Ginapabaskog man sang EOC ang Covid-19 vaccination caravan para mas mapangapinan pa ang mga healthcare workers paagi sa booster dose.